قيام الليل

أمنا عائشة 5

أمنا عائشة 4

أمنا عائشة 3

أمنا عائشة 2

أمنا عائشة 1

كلام لونه بينكى

طيب نبدأ بتحية الإسلام .. السلام عليكم و رحمة الله و بركاته

فى الحقيقة لدى كلمة قصيرة أود أن أتوجه بها إلى أخواتنا البنات على فيسبوك و غيره من المواقع الإجتماعية

مش عارف محدش مش راضى يسمعنى ليه ؟؟.. يا شبااااب انا واقف بتكلم اسمعونى من فضلكم!! ^^

أيوة كده كل سكت و بيبصلى.. أتكلم بقة..

إحم... أحب اقول للبنات إخواتنا اللى بتحط صور لبنات و ممثلات لابسين عريان أو صور تعمل فتنة بشكل عام.. انتوا يا جماعة عارفين ان ده حرام؟؟

يعنى هل إنتوا مدركين انكم بتعملوا شىء حرام بإنكم حاطين صور لبنات لابسة عريان أو صور تعمل فتنة؟

شايفكم بتبصوا لبعض و ساكتين... أظن يبقى كده انتوا عارفين انها حرام..

مرة كنت فى صفحة إسلامية و شفت تعليق من بنت فى الصفحة كاتبة ايه بقة... اللهم انا نسألك حسن الخاتمة... تعرفوا البنت دى كانت حاطة صورة ايه؟؟  صورة ممثلة شبه عارية بدون مبالغة!!

طيب فى تناقض أكتر من كده؟؟

سامع واحدة بتتكلم بصوت واطى بتقول بس دى صورة شايفاها عادية يعنى و ايه المشكلة لما أحط صورة ممثلة لابسة ضيق و لا قصير... هو انا اللى لابسة و لا هى؟؟

أرد عليكى و اقولك طبعا هى اللى لابسة .. بس انتى الى بتخاللينى اشوفها عن طريقك يعنى انتى اتسببتى فى انى ارتكب ذنب و كده يبقى انتى أصبحتى مصدر الذنب زيك زيها تماااام.. هى لبست عريان و انتى شيلتى معاها ذنوب!! ده يرضيكى؟

يرضى مين يا جماعة تشيلوا ذنوب مالكوش ذنب فيها؟.. يرضى مين تتسببى إن الشباب تشيل ذنوب؟؟

طيب هل انتوا عارفين إيه المترتب على انكم حاطين صور لبنات و ممثلات ؟؟

ركزوا معايا هنا بقة علشان كلام خطير جدااااااااااااااا

أولاً: ده اسمه مجاهرة بالذنب.. يعنى بتعملى الذنب  بشكل علنى و بتجاهرى بيه... ده بقة سيدنا محمد صلى الله عليه و سلم قال عليه كلام فى منتهى الخطورة...

قال.. كل أمتى معاف إلا المجاهرين... يرضيكى تكونى من المجهارين بالذنب؟؟  يعنى تعملى الذنب و لا يهمك ان الناس تعرف عادى كده.. و ده اللى سيدنا محمد صلى الله عليه و سلم حذر منه؟؟!

ثانيا  سيئة جارية.. دى بقة فى منتهى منتهى منتهى الخطورة... تبقى حضرتك كده قاعدة لا بيكى و لا عليكى ..و فى عداد ذنوب عمال يعد بالليل و النهار و انتى و لا دريانة  لحد ما تقابلى ربنا يوم القيامة و على كتافك جبااااااال ذنوب مكونتيش عاملة حسابها!!... عمرك اتخيلتى كده انتى مسافرة مصيف لمدة شهر مثلا و سايبة تكييف الشقة قدرته مثلا 12 حصان  شغال بشكل متواصل...  تخيلى لما ترجعى حيكون عداد النور عمل قد ايه استهلاك و استحقاق فلوس عليكى؟؟؟! طبعا كارثة حقيقة صح؟؟ ... ما بالك بقة بعداد الذنوب.. و دى بقة مش فلوس... دى ذنوووووب  يعنى و العياذ بالله كلام جد مش هزار و فى جهنم مستنية .. و نعوذ بالله من جهنم و انا و الله خايف عليكى و بنصحك لوجه الله

ثالثا بتنشرى الفساد أو حسب التعبير القرآنى.. تسعى فى الأرض فساداً  لإنك  بتساهمى فى نشر اشياء تحث على الرزيلة مع ان ده مش فى بالك و لا قصدك لكن للأسف انتى مستوعبة حجم الحكاية دى كبير قد ايه

و خدى بالك ان ربنا عز و جل قال ىية فى منتهى منتهى منتهى الخطورة 

إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلَافٍ أَوْ يُنْفَوْا مِنَ الْأَرْضِ ذَٰلِكَ لَهُمْ خِزْيٌ فِي الدُّنْيَا وَلَهُمْ فِي الْآخِرَةِ عَذَابٌ عَظِيمٌ

طبعا انتى مش فى بالك ان الكلام ده كله علشان حتة صورة لا راحت و لا جات... لكن افكرك بحديث سيدنا محمد لما قال.. ان المرء ليقول الكلمة لا يلقى لها بالاً فتلقى به فى جهنم سبعين خريفاً..

ده من كلمة واحدة ما بالك بقة بفعل؟؟

رابعا: بتشجعى غيرك على نفس الفعل و بكده انتى مش بس بتشيلى ذنوب اللى يشوف الصور.. لااااااا  ده انتى كمان بتشيلى ذنوب  اللى حط صور زى اللى انتى بتحطيها عشان عجبتها الفكرة من خلالك.. و طبعا ذنوب اللى يتفرجوا على الصور دى من خلال الناس دول!!!!  يعنى خرااااااااب مستعجل و من جميع النواحى

و الله  انا فاكر فى موقف كنت فى صفحة اسلامية و شفت تعليق من بنت حاطة صورة ممثلة لابسة عريان و لاقيتها كاتبة تعليق يبين انها بتحب الدين

بعتلها رسالة  انها كده بتعمل فعل حرام .. و الله  فى ساعتها غيرت الصورة و بعتت تقولى جزاك الله خير... شوفتوا  ازاى ان فى ناس بتعمل الغلط بس عن جهل مش عمد؟

.. سامع واحدة عمالة تأف اف و تقول : انتوا خلاص سايبين كل حاجة و جايين تتكلموا عن البنات .. ما تخاليكوا فى نفسكوا..

أقولها بمنتهى البساطة.. الكلام ده تقوليىه لو كنتى على دين غير الإسلام و العياذ بالله.. الناس دول هما اللى عندهم ان الواحد يعمل الخطا و محدش يقوله أى حاجة.. انما الإسلام شىء مختلف تمام... ربنا عز و جل قال  عن المسلمين حاجة جميلة جدا

كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ

يعنى المسلمين هم خير أمة علشان بنأمر بالمعروف و ننهى عن المنكر.. ده معناه مفيش حاجة اسمها خالليكوا فى نفسكوا.. ده دين و الدين مش بتاع حد و ده لا يتعارض مع الحرية الشخصية.. انا مدخلتش عليكى بيتك مثلا و قلتلك انتى بتعملى غلط.. لا انا بنتقد شىء بتعمليه على العلن و بيضر ناس تانية..

و سيدنا محمد صلى الله عليه و سلم قال برضه  إذا رأى أحدكم منكراً فاليغيره بيده, و إن لم يستطع فبلسانه, و إن لم يستطع فبقلبه و ذلك أضعف الإيمان.. صدق رسول الله صلى الله عليه و سلم

الكلام ده يا جماعة مش مقصود بيه شخص معين.. لا ده مقصود بيه كافة البنات المسلمات اللى بنخاف عليهم زى اخواتنا تمام

و بنحب مصلحتهم لوجه الله

فى حكمة بتقول : لا تنظر لصغر المعصية .. بل انظر لعظمة من عصيت

و قال تعالى : وَتَحْسَبُونَهُ هَيِّنًا وَهُوَ عِنْدَ اللَّهِ عَظِيمٌ

أرجو إنى أكون وصلت الفكرة .. فى ناس بتعمل الخطأ عن جهل و غير عمد و لما بتعرف الصح بترجع عن الخطأ من غير ما تتكبر..

و دول اللى ربنا قال عليهم

الَّذِينَ يَسْتَمِعُونَ الْقَوْلَ فَيَتَّبِعُونَ أَحْسَنَهُ أُولَٰئِكَ الَّذِينَ هَدَاهُمُ اللَّهُ وَأُولَٰئِكَ هُمْ أُولُو الْأَلْبَابِ

 ربنا يرضى عنا و عنكم ان شاء الله

اللهم اجعلنا من الذين يستمعون القول فيتبعون أحسنه

آمين

أنشروا المقال ده فى صفحاتكم يا جماعة و لا تبخلوا على اخواتكم بالتذكرة عسى  الله ان يجعله سبباً فى رجعوع واحدة عن المعصية و تاخدوا ثواب عظيم ان شاء الله

و آخر دعوانا أن الحمد لله رب العالمين

الرحيق المختوم

قادمون

يوم الجمعة



Add caption

انشروها عاوزين حسنااات :)

قلبى لربى

صيام

راجعينلك يا رب

سوا على الجنة

دين الحق

نقاوة الإيمان

النبى صلى الله عليه و سلم... إنسان؟؟

إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا

اللهم صلى على محمد و آل محمد كما صليت على إبراهيم و آل إبراهيم و بارك على محمد و آل محمد كما باركت على إبراهيم و آل إبراهيم فى العالمين إنك حميد مجيد

ايه ده! هو انا حصلى على النبى لوحدى؟ يالا كلنا نصلى عليه :)

أحبائى فى الله ازيكو؟ يارب تكونوا بخير دايماً و إن شاء الله حتكونوا بخير طول مانتوا موحدين بالله و مسلمين, ربنا يبارك فيكم و يعزكم و يرضى عننا جميعا آمين.. ماتقولوا آمين! :)

المعلومة اللى حتكلم عنها النهاردة حتستغربولها شوية هى عن خاتم النبيين و الرسل و سيد ولد آدم..نبى الرحمة سيدنا محمد صلى الله عليه و سلم. و علاقته بكلمة إنسان!!

المعلومة دى سمعتها فى درس من كذا سنة كده يمكن 7 سنين مثلا بس فضلت معلقة فى مخى لحد دلوقتى و هى عن لفظ كلمة الإنسان! تقريبا كانت من الشيخ محمد اسماعيل المقدم حفظه الله..

شايف واحد عمال يقول ( و إيه علاقة كلمة إنسان بسيدنا محمد صلى الله عليه و سلم ما تدخل فى الموضوع مش فاضينلك ؟؟)

أقوله بس اهدى عليا شوية و الله حشرحلك.. انت مالك عصبى كده ليه؟  :)

الأول تعالوا نشوف كلمة إنسان فى القرآن الكريم ربنا بيذكرها فى أنهى مواضع؟

إِنَّ الْإِنْسَانَ لَفِي خُسْرٍ ﴿العصر: ٢﴾

قُتِلَ الْإِنْسَانُ مَا أَكْفَرَهُ ﴿عبس: ١٧﴾

إِنَّ الْإِنْسَانَ خُلِقَ هَلُوعًا ﴿المعارج: ١٩﴾

كَلَّا إِنَّ الْإِنْسَانَ لَيَطْغَىٰ ﴿العلق: ٦﴾

إِنَّ الْإِنْسَانَ لِرَبِّهِ لَكَنُودٌ ﴿العاديات: ٦﴾

لَقَدْ خَلَقْنَا الْإِنْسَانَ فِي كَبَدٍ ﴿البلد: ٤﴾

وَيَدْعُ الْإِنْسَانُ بِالشَّرِّ دُعَاءَهُ بِالْخَيْرِ وَكَانَ الْإِنْسَانُ عَجُولًا ﴿الإسراء: ١١﴾

أَيَحْسَبُ الْإِنْسَانُ أَنْ يُتْرَكَ سُدًى ﴿القيامة: ٣٦﴾

بَلْ يُرِيدُ الْإِنْسَانُ لِيَفْجُرَ أَمَامَهُ ﴿القيامة: ٥﴾

يَقُولُ الْإِنْسَانُ يَوْمَئِذٍ أَيْنَ الْمَفَرُّ ﴿القيامة: ١٠﴾

أَيَحْسَبُ الْإِنْسَانُ أَلَّنْ نَجْمَعَ عِظَامَهُ ﴿القيامة: ٣﴾

يَا أَيُّهَا الْإِنْسَانُ مَا غَرَّكَ بِرَبِّكَ الْكَرِيمِ ﴿الإنفطار: ٦﴾

خَلَقَ الْإِنْسَانَ مِنْ نُطْفَةٍ فَإِذَا هُوَ خَصِيمٌ مُبِينٌ ﴿النحل: ٤﴾

خُلِقَ الْإِنْسَانُ مِنْ عَجَلٍ سَأُرِيكُمْ آيَاتِي فَلَا تَسْتَعْجِلُونِ ﴿الأنبياء: ٣٧﴾

وَجَعَلُوا لَهُ مِنْ عِبَادِهِ جُزْءًا إِنَّ الْإِنْسَانَ لَكَفُورٌ مُبِينٌ ﴿الزخرف: ١٥﴾

أَوَلَمْ يَرَ الْإِنْسَانُ أَنَّا خَلَقْنَاهُ مِنْ نُطْفَةٍ فَإِذَا هُوَ خَصِيمٌ مُبِينٌ ﴿يس: ٧٧﴾

لَا يَسْأَمُ الْإِنْسَانُ مِنْ دُعَاءِ الْخَيْرِ وَإِنْ مَسَّهُ الشَّرُّ فَيَئُوسٌ قَنُوطٌ ﴿فصلت: ٤٩﴾

وَهُوَ الَّذِي أَحْيَاكُمْ ثُمَّ يُمِيتُكُمْ ثُمَّ يُحْيِيكُمْ إِنَّ الْإِنْسَانَ لَكَفُورٌ ﴿الحج: ٦٦﴾

وَجِيءَ يَوْمَئِذٍ بِجَهَنَّمَ يَوْمَئِذٍ يَتَذَكَّرُ الْإِنْسَانُ وَأَنَّىٰ لَهُ الذِّكْرَىٰ ﴿الفجر: ٢٣﴾

وَلَئِنْ أَذَقْنَا الْإِنْسَانَ مِنَّا رَحْمَةً ثُمَّ نَزَعْنَاهَا مِنْهُ إِنَّهُ لَيَئُوسٌ كَفُورٌ ﴿هود: ٩﴾


دى معظم المواضع اللى ذكر الله فيها كلمة إنسان فى القرآن الكريم..كلها كلمات خالية من المدح بالعكس ده فيها ذم زى ما الآيات موضحة تماماً
طيب و أيه علاقة ده بسيدنا محمد؟
أقولكم طبعا أولاً سيدنا محمد كان بشر خلقه الله مثله مثل سائر ولد آدم و مات
إِنَّكَ مَيِّتٌ وَإِنَّهُمْ مَيِّتُونَ ﴿الزمر: ٣٠
و سوف يبعث أيضاً يوم القيامة..علشان محدش يفتكر انى بقول أى حاجة مختلفة..لكن الإختلاف هنا إنه لا يجوز وصف سيدنا محمد صلى الله عليه و سلم بكلمة "إنسان"

*شايف واحد بيرفع حواجبه و مش عاجبه الكلام!! .. ركز معايا كده و اسمع الدليل

زى ما شفنا مع بعض يا أحبائى فى الله ازاى كلمة إنسان اقترنت فى معظم الأوقات بذم.. ده غير إن الله عز و جل لم ينادى سيدنا محمد مطلقاً بلفظ إنسان فى القرآن الكريم و لا حد من الصحابة قال على سيدنا محمد لفظ إنسان..
بل كانوا ينادونه بيا رسول الله أو النبى الكريم  أو نبى الله  و كلها ألفاظ تشريف فياله من شرف أن يقترن اسم النبى محمد صلى الله عليه و سلم بلقب رسول الله..!! ..سبحان الله

الله عز و جل و كما هو مذكور فى القرآن كان ينادى النبى صلى الله عليه و سلم .. ب يا أيها النبى.. و ليس الإنسان.. كمان 

ربنا قال عنه.. إِنَّهُ لَقَوْلُ رَسُولٍ كَرِيمٍ ذِي قُوَّةٍ عِنْدَ ذِي الْعَرْشِ مَكِينٍ مُطَاعٍ ثَمَّ أَمِينٍ 

شفتوا يا جماعة الفرق؟ أبعد ما يكون عن لفظة إنسان اللى دايما اقترنت بالذم زى ( كفور) و (قنوط) و (فى خسر) و (عجولا) و (خصيم مبين).. و غيرها من أوصاف الذم

بالله عليكم ينفع نقول على النبى صلى الله عليه و سلم بعد كل ده

النبى الإنسان"!؟؟ زى مافى برنامج للاسف معمول بيقدمه الشيخ طارق سويدان ...

للأسف هو مسمى دارج  بيقوه الناس زى مثلاُ لما حد يكون على خلق يقولوا عليه فلان ده إنسان .. مش عارف ليه بيفكروا ان الكلمة دى مدح مع ان ربنا عز و جل لم يذكرها فى مواضع مدح!!

 مش كان من الأفضل يكون البرنامج مثلا اسمه نبى الرحمة مثلا؟  أو رحمة للعالمين؟ أو النبى الأعظم؟

انما النبى الإنسان ؟؟

القراآن الكريم إعجاز لغوى و فيه أدق التوصيف و أبلغ التعبير و مفيش كلام بعد كلام ربنا  و لا توصيف أو تشبيه ابلغ مما جاء فى الكتاب العظيم كتاب رب العالمين

مهما كانت النوايا و مهما كان قصدنا و خصوصا دلوقتى بعد ما عرفتوا دلالات الكلام و معانيه من كتاب الله عز و جل و انتوا عارفين ان القرآن فيه دقة رهيبة فى الوصف و التعبير و إن القرآن الكريم عبارة عن إعجاز لغوى مافيهوش حرف واحد على الفاضى.

قال تعالى عن نبى الرحمة.. وَمَا أَرْسَلْنَاكَ إِلَّا رَحْمَةً لِلْعَالَمِينَ ﴿الأنبياء: ١٠٧﴾ و أيضاً قال
يَا أَيُّهَا النَّبِيُّ إِنَّا أَرْسَلْنَاكَ شَاهِدًا وَمُبَشِّرًا وَنَذِيرًا ..الأحزاب: ٤٥ 

سبحان الله .. و لا مرة يا ناس ربنا يقول كلمة إنسان فى القرآن على حد مؤمن ز نيجى احنا نقولها على سيدنا محمد؟ صلى الله عليه وسلم؟

أترك الإجابة ليكم...

إنى و الله أحبكم فى الله و أسال الله العظيم ان يبارك فيكم و أعزكم وأن يرزقنى و إياكم رزقاً واسعاً و قلبأ خاشعاً و علماً نافعاً و دعاءً يستجاب له.
و صلى اللهم و سلم و بارك على محمد و آله و صحبه آجمعين

و الحمد لله رب العالمين.

فتنة

حبيبى يا رسول الله

هو انت مؤمن؟

بسم الله و الصلاة و السلام على رسول الله

سؤال برىء يطرح نفسه.. هو انت مؤمن؟!

واحد يطلع و يقولى لا انا محمد..!!

الله يكرمك انا مش بسأل عن اسمك انت فاهم قصدى كويس !! :) 

طيب أى حد حيقولى طبعا انا مؤمن ...أقوله طيب الحمد لله كويس انك حابب تكون كده بس يا ترى انت عارف ايه هى المواصفات اللى لازم تتوافر فيك علشان تكون مؤمن (أصلى) ..(مش صينى) ؟ :)

كلنا عارفين إن أى صفة محتاجة مواصفات علشان تكون متواجدة ..مثلا المنافق بيكذب و يخون الامانة و يخلف وعده و ما الى ذلك من صفات ذميمة.. بس يا ترى إيه مواصفات المؤمن ؟؟

أرد هنا و أقول ان مفيش حد وصف المؤمن خير من وصف القرآن الكريم للمؤمن ..قال تعالى : قَدْ أَفْلَحَ الْمُؤْمِنُونَ ﴿١﴾ ... اللى هما :

الَّذِينَ هُمْ فِي صَلَاتِهِمْ خَاشِعُونَ ﴿٢﴾ ...انت بتخشع فى صلاتك؟

وَالَّذِينَ هُمْ عَنِ اللَّغْوِ مُعْرِضُونَ ﴿٣﴾ .. تاركون لكل ما لا خير فيه من الأقوال والأفعال

وَالَّذِينَ هُمْ لِلزَّكَاةِ فَاعِلُونَ ﴿٤﴾  ... يا ترى انت مواظب على الزكاة؟

وَالَّذِينَ هُمْ لِفُرُوجِهِمْ حَافِظُونَ ﴿٥﴾ إِلَّا عَلَىٰ أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ ﴿٦﴾ فَمَنِ ابْتَغَىٰ وَرَاءَ ذَٰلِكَ فَأُولَٰئِكَ هُمُ الْعَادُونَ ﴿٧﴾

يعنى مفيش زنا و لا ما شابه من محرمات..(انت فاهم قصدى كويس....! )

وَالَّذِينَ هُمْ لِأَمَانَاتِهِمْ وَعَهْدِهِمْ رَاعُونَ ﴿٨﴾ ...يا ترى انت بتوفى بوعدك و عهدك؟ يا ترى بتحفظ الأمانة؟

وَالَّذِينَ هُمْ عَلَىٰ صَلَوَاتِهِمْ يُحَافِظُونَ ﴿٩﴾ ....يا ترى بتحافظ على صلاتك و لا بتصلى على سطر و تسيب سطر؟؟

أُولَٰئِكَ هُمُ الْوَارِثُونَ ﴿١٠﴾ الَّذِينَ يَرِثُونَ الْفِرْدَوْسَ هُمْ فِيهَا خَالِدُونَ

الله اكبر.. هو ده الجزاء..جزاء إنك مؤمن.. يرثك الله الفردوس....نسأل الله أن نكون ممن يرثون الفردوس  الأعلى ..يا الله آمين

شفتوا إزاى ربنا رحيم و كريم لأى درجة؟؟ ربنا بنفسه قايلك ازاى تكون مؤمن و تكونى مؤمنة.. و كمان قايل الجزاء بنفسه بما لا يدع مجال للقيل و القال و ده ان دل على شىء فبيدل على  الأهمية القصوى للأمر لدرجة إن الله عز و جل يصفها بالدقة و بالتفصيل... يا ترى شباب بعد ما شوفنا التفصيل ده و عرفنا أهميته.. نسأل السؤال ده لنفسنا و نجاوب برضه مع نفسنا... هو إنت مؤمن؟

لو شايفين إن اللى مكتوب ده فى أى فايدة .انشروه بين إخوانكم يمكن ربنا يجعله سبب فى هداية حد

Please share this topic if  you like it

و سلام على المرسلين و الحمد لله رب العالمين

النبى محمد صلى الله عليه وسلم

نفسك دعائك يكون مستجاب؟؟

وَقَالَ رَبُّكُمُ ادْعُونِي أَسْتَجِبْ لَكُمْ 

الدعاء شىء مهم جدا جدا جدا لينا كلنا و ربنا بيحب يسمع دعائنا و بيغضب على اللى مش بيدعوه و النبى عليه الصلاة و السلام قال مَنْ لَمْ يَسْأَلِ اللَّهَ يَغْضَبْ عَلَيْهِ 

و كمان ربنا قال ( قُلْ مَا يَعْبَأُ بِكُمْ رَبِّي لَوْلَا دُعَاؤُكُمْ )

إيه رأيكم لو قلتلكم أزاى دعائكم يستجاب؟؟؟

واحد يسأل و يقول هو الموضوع سهل كده؟ 

أعدل النضارة على وشى (مع انى مش بلبس نضارة) و اعوج بقى و أعمل فيها خبير و اسكت لحظة و اقوله بصوت هادى : أيوة سهل

ايه ده و الله؟ طيب ما تيجوا نعرف ايه موضوع الدعاء ده و ازاى هو سهل و ليه فى دعاء مش بيستجاب و ازاى الدعاء يستجاب؟؟؟

المرة دى بقة اخلع النضارة خالص :) و ابص للسقف و اعمل نفسى بفكر تفكير عميق ..و أرد أقول :

أول حاجة- لازم نعرفها يا شباب يا إخوان و يا أخوات, هى ان الدعاء له شروط معينة لازم تتوافر فيه 

أول حاجة- لازم الدعاء يكون خالص لله عز و جل يعنى مش مثلا نقول ببركة فلان أو كده , ده معناه ان التوحيد شىء اساسى فى عقيدة المسلم و نعوذ بالله من الشرك

تانى حاجة مايكونش الدعاء بشىء فى معصية لربنا يعنى ماندعيش مثلا ان فلان تتقلب بيه عربيته ^^

تالت حاجة- اللى بيدعى لااااازم يكون متأكد ان ربنا حيستجيب دعائه يا جماعة و دى خطيررررة جدا لان محدش يشكك فى قدرة ربنا و كرمه و جزيل عطائه ده غير إن ربنا فال.. و قل ادعونى أستجب لكم.... يعنى الإستجابة بتحصل بمجرد الدعاء...بس يكون دعاء صح زى ما حنوضح ان شاء الله فى النقط اللى جاية..

يعنى لازم جواك يكون فيه يقين رهيب ان فى اللحظة اللى انت قلت فيها الدعاء..خلاص الدعاء استجاب و العملية خلصت..ثقة منك فى قدرة ربنا

-- الله ! طيب ما هو ممكن واحد يسأل و يقول طيب منا عمال أدعى و مش بيستجاب الدعاء اومال ليه بتقول ان الدعاء استجاب؟؟

أرد اقوله لو سمحت وطى صوتك.. و خد منى الرد ده.. إن النبي عليه الصلاة والسلام قال : " ما من مسلم يدعو بدعوة ليس فيها إثم ولا قطيعة رحم إلا أعطاه الله بها احدى ثلاث : إما ان يعجل له دعودته , وإما أن يدّخرها له في الآخرة , وإما أن يصرف عنه من السوء مثلها , قالوا : إذاً نكثر , قال : الله أكثر " رواه احمد , الله أكثر – أي فضل الله أعمّ – وعطاياه لا تُحدّ , وكنوزه لا تنفذ , فهو واسع الجود واسع الرحمة . صدق رسول الله صلى الله عليه وسلم

وقد يسأل العبد ربه حاجة ليقضيها له , ولكن الله يمنعه إياها , ليس بُخلاً منه , ولا إهانة للسائل , ولكن الله يدّخرها له , إلى يوم القيامة , يوم يكون العبد فى أمسّ الحاجة إلى هذا الثواب المدّخر . 

و بعدين حقولكم على حاجة ..اذا كان ابليس اللى هو الشيطان الرجيم دعا ربنا و ربنا استجابله..يبقى مش حيستجيبلك انت يا مؤمن؟ :).. مش إبليس دعا ربنا و قاله ( قَالَ رَبِّ فَأَنْظِرْنِي إِلَىٰ يَوْمِ يُبْعَثُونَ ) ربنا رد عليه قاله ايه؟ (قَالَ فَإِنَّكَ مِنَ الْمُنْظَرِينَ إِلَىٰ يَوْمِ الْوَقْتِ الْمَعْلُومِ ) يعنى استجابة و فورية كمان!

رابع حاجة-- ابعد عن السجع و الكلام المتفصل و المتكلف..سيدنا محمد كان بيحب الدعاء اللى فيه شمولية زى مثلا ربنا آتنا فى الدنيا حسنة و فى الآخرة حسنة و قنا عذاب النار... صلى الله عليه و سلم

خامس حاجة.. داعياً بصوت منخفض خفي، كما قال الله تعالى (ادعو ربكم تضرعاً وخفية) (الأعراف/55). وقد أثنى الله سبحانه على نبيه زكريا عليه السلام فقال: (إذ نادى ربه نداءً خفياً) (مريم/3). 

سادس حاجة-- رافعاً الداعي يديه قُبالة وجهه، ضاماً إحداهما للأخرى. فإن رفع اليدين من أسباب الاستجابة كما في قول النبي صلى الله عليه وسلم "إن ربكم حيي ستير، يستحيي من عبده إذا رفع يديه إليه أن يردهما صفراً"

سابع حاجة-- الإكثار من الدعاء حال الرخاء فقد ثبت عن النبي صلى الله عليه وسلم أنه قال: "من سره أن يستجيب الله له عند الشدائد والكُرب فليكثر الدعاء في الرخاء" رواه الترمذي

ثامن حاجة---مُلحاً بالدعاء مع تكراره ثلاثاً، كما في حديث ابن مسعود رضي الله عنه "أن النبي صلى الله عليه وسلم كان يعجبه أن يدعو ثلاثاً، ويستغفر ثلاثاً" رواه أبو داود

تاسع حاجة-- لا يستبطئ الاستجابة، ولا يضجر إذا تأخرت، ولا ييأس فيدع الدعاء، وإلا كان "مستحسراً" فيأثم، إذ اليأس من رحمة الله من الكبائر،ومن استحسر:انقطع. قال الله تعالى﴿وله من في السماوات والأرض ومن عنده لا يستكبرون عن عبادته ولا يستحسرون﴾(الأنبياء/19).ولا يستحسرون: أي لا يتعبون. وعن ابن عباس رضي الله عنهما أن رسول الله صلى الله عليه وسلم سُئِلَ عن الكبائر،فقال:"الشرك بالله، واليأس من روح الله، والأمن من مكر الله". 

عاشر حاجة-- مايكونش اللى بيدعى قاطع رحم و لاعاق لوالديه

الحادى عشر---مستفتحاً الدعاء بالحمد، والثناء على الله تعالى بما هو أهله، والصلاة والسلام على خاتم أنبيائه ورسله صلى الله عليه وسلم و متوسلاً إلي الله سبحانه بتوحيده، وأسمائه، وصفاته، وبصالح الأعمال، ثم تسأل حاجتك. 

الثانى عشر... تدعى فى اتجاه القبلة

الثالث عشر--- تكون طاهر.. مش على جنابة مثلا..استحموا الاول يعنى :)

الرابع عشر-- مختتماً الداعي دعاءه باسم من أسماء الله الحسنى، يناسب مطلوبه، وهذا دأب الأنبياء عليهم السلام في دعائهم، كما في آيات القرآن الكريم، وفي أدعية النبي محمد صلى الله عليه وسلم وهي في السنة كثيرة.

معلش طولت عليكم..لكن الموضوع فعلا يستاهل و كمان يستاهل انه يتنشر فى كل حتة..و كلنا عاوزين ربنا يستجيب دعائنا و ربنا بيحب العبد اللى بيجتهد فى الدعاء و يدعى ربنا كتير فى السراء و الضراء

حاجة أخيرة كل واحد بيقرا الكلام ده يعرف انى بحبه فى الله و اسال الله عز و جل أن يرزقنى و إياه رزقاً واسعا و قلباً خاشعاً و علماً نافعاً..و دعاء يستجاب له..

و صلى اللهم و سلم و بارك على محمد و على آله و صحبه و سلم

و الحمد لله رب العالمين